Stjórn hefur samþykkt ársreikning sjóðsins fyrir árið 2025.
Hrein eign sjóðsins til greiðslu lífeyris í árslok nam 624,4 ma.kr. en var 557,2 ma.kr. í lok árs 2024 og hækkaði um 67,2 ma.kr. milli ára. Þar af var hrein eign Lífeyrissjóðs starfsmanna Akureyrarbæjar í upphafi árs 14,6 ma.kr. en sjóðurinn var sameinaður Brú í nýrri E deild í upphafi árs 2025. Hrein nafnávöxtun Brúar var 7,8% og hrein raunávöxtun 4,0%.
Sjóðfélagar og iðgjöld
Iðgjöld námu 33,3 ma.kr. á árinu 2025 (2024: 30,7 ma.kr.), þar af voru 6,8 ma.kr. vegna aukaframlaga. Alls greiddu að meðaltali 22.806 einstaklingar iðgjöld til sjóðsins (2024: 22.646) og skiptust þeir milli deilda sem hér segir:
Lífeyrisþegar og lífeyrisgreiðslur
Sjóðurinn greiddi 25,6 ma.kr. í lífeyri á árinu 2025 (2024: 21,4 ma.kr.), þar af 20,0 ma.kr. í eftirlaun og 3,2 ma.kr. í örorkulífeyri. Að meðaltali fengu 18.095 einstaklingar greiddan lífeyri frá Brú á árinu 2025 (2024: 16.315) og skiptust þeir milli deilda sem hér segir:
Tryggingafræðileg staða
Tryggingafræðileg úttekt er gerð sérstaklega fyrir hverja deild sjóðsins og undirliggjandi réttindasöfn. Við úttektina er miðað við að raunávöxtun eigna verði 3,5% á komandi árum fyrir A og V deild en fyrir R, E og B deild er gert ráð fyrir að raunávöxtun verði 2,0% árlega umfram hækkun lífeyrisréttinda.
Heildareignir umfram heildarskuldbindingar skiptast á milli deilda sem hér segir:
Hlutfall heildareigna umfram heildarskuldbindingar einstakra deilda er sem hér segir:
Niðurstaða tryggingafræðilegrar athugunar fyrir A deild og V deildar eru innan þeirra marka sem áskilin eru í 39. gr. laga nr. 129/1997 um skyldutryggingu lífeyrisréttinda og starfsemi lífeyrissjóða.
Reikniforsendur um örorku-, giftingar- og barneignalíkur eru óbreyttar frá síðustu tryggingafræðilegri athugun sjóðsins. Örorkulíkur taka mið af reynslu áranna 2018-2023 og eru síðan aðlagaðar að reynslu hverrar deildar hjá sjóðnum. Giftingar- og barneignalíkur eru byggðar á reynslu áranna 2019-2023.
Ávöxtun ársins
Raunávöxtun sjóðsins var 4,0% á árinu 2025 (2024: +7,8%) og nafnávöxtun 7,8% (2023: +12,9%). Lífeyrissjóðurinn er langtímafjárfestir og hefur skilað góðri ávöxtun síðustu ár að undanskildu árinu 2022. Meðalávöxtun síðustu 5 ára er 1,7% og síðustu 10 ára 3,1%, sem er aðeins undir því viðmiði sem lífeyrissjóðir setja sér, en gert er ráð fyrir að lífeyrissjóðir nái 3,5% raunávöxtun á ári að meðaltali.
Ávöxtun ársins er ásættanleg í samanburði við fyrri ár en árið einkenndist af miklum sveiflum á mörkuðum og aukinni spennu í alþjóðahagkerfinu. Ávöxtun innlendra hlutabréfa var umfram vísitölu og ávöxtun áfram góð á erlendum hlutabréfamörkuðum. Verðbólga var hins vegar þrálát og vaxtastig áfram hátt. Á árinu fór fram uppgjör á skuldabréfum útgefnum af Íbúðalánasjóði (HFF bréfum) og afhenti ríkið safn ríkisbréfa auk reiðufjár við uppgjör þeirra. Vísitala innlendra hlutabréfa lækkaði um 7,45% á árinu samanborið við hækkun um 12,62% á árinu 2024, en hækkun varð á innlendum skuldabréfamarkaði.
Grænar eignir
Sjóðurinn veitir upplýsingar um hversu stórt hlutfall af eignum sjóðsins teljast vera grænar eignir í samræmi við flokkunarreglugerð ESB (2020/852). Sú reglugerð skilgreinir hversu sjálfbær eða græn atvinnustarfsemi fyrirtækja telst en fyrirtækjum á fjármálamarkaði ber að nota upplýsingarnar til að upplýsa hvernig þær endurspeglast í starfsemi þeirra.
Grænt eignarhlutfall sjóðsins var á bilinu 0,4% til 2,9% í lok árs í deildum sjóðsins. Það er reiknað út frá veltu eða fjárfestingargjöldum undirliggjandi fyrirtækja og tekur til allra fjárfestingaeigna sjóðsins að frátöldum eignum með ríkisábyrgð.
Eitt af markmiðum flokkunarreglugerðar ESB er að stuðla að fjárfestingum í sjálfbærum rekstri og sporna gegn grænþvotti. Reglugerðin tók gildi 1. júní 2023, en sjálfbærniregluverk EES hefur á síðari misserum verið endurskoðað með það að markmiði að draga úr upplýsingabyrði fyrir fyrirtæki og einfalda framkvæmd regluverksins. Ljóst er að fyrirkomulag og umfang þessarar upplýsingagjafar mun taka breytingum á komandi árum. Upplýsingar sem hér eru birtar ber því að skoða með fyrirvara, enda er innleiðing og þróun sjálfbærniupplýsinga enn á byrjunarstigi.
Helstu stærðir ársins koma fram í töflunni hér fyrir neðan:
